Молитвы

• Кондак священномученика Василия, епископа Амасийского

  • глас 4
  • Царево повеление преобидев,/ Царство Небесное получил еси, Василие,/ в немже ликуя,/ поминай нас, чтущих память твою,/ священномучениче.

• Тропарь святителя Доната, епископа Еврийского

  • глас 8
  • Благий ярем Христов и бремя легко Евангельскаго учения взем,/ иерарше Донате Богоблаженне,/ вельми подвизался еси во временней жизни,/ архиерей убо Богоугоден быв,/ добре пасый люди Божия,/ просветив тыя учением,/ чудотворением вселенную удивил еси./ Сего ради молим тя:/ да избавит нас Христос Бог от всяких бед/ и Небеснаго блаженства сподобит.

• Ин тропарь святителя Доната, епископа Еврийского

  • глас 4
  • Блажен делатель и украситель Церкве Христовы,/ отче Донате, был еси,/ непрестанно попечение о стаде твоем стяжав,/ научая и руководя оно в любви Сына Божия,/ не токмо бо в твоем граде многий народ,/ но в Константинополе самодержца и в нем вся люди/ удивил еси/ православными чудесы твоими./ Богоугодныя убо мольбы/ сотворяя ко Христу Богу,/ помощник скор всем явися,/ предстоя Всесвятей Троице,/ в Вышних моли Ю о всех нас,/ да спасет души наша.

• Кондак святителя Доната, епископа Еврийского

  • глас 8
  • Красото Церкве, утвердившийся на камени — Боговоплощенном Спасе Христе,/ Богоправимое добродетелей правило,/ Донате, досточудный чудотворче,/ яко иерарх имееши дерзновение всетворящему Богу о людех молитися,/ врагов видимых и невидимых предстательством твоим свободи вопиющия:/ слава в Троице Единому Богу.

• Тропарь апостола Иакова Зеведеева, брата Иоанна Богослова

  • глас 3
  • Апостоле святый Иакове,/ моли Милостиваго Бога,/ да прегрешений оставление/ подаст душам нашим.

• Ин тропарь апостола Иакова Зеведеева,брата Иоанна Богослова

  • глас 3
  • Апостол Христов был еси избранный/ и Богослову возлюбленному брат единородный,/ всехвальне Иакове,/ поющим тя грехов оставление испроси/ и душам нашим велию милость.

• Кондак апостола Иакова Зеведеева, брата Иоанна Богослова

  • глас 2
  • Глас Божественный слышав, призывающ тя,/ любовь отца презрел еси/ и притекл еси ко Христу, Иакове, с сродником твоим, славне,/ с нимже сподобился еси видети/ Господне Божественное преображение.

• Кондак святителя Игнатия Брянчанинова, епископа Кавказского и Черноморского

  • глас 8
  • Аще и совершал еси стезю жития земнаго, святителю Игнатие, обаче непрестанно зрел еси законы бытия вечнаго, сему поучая ученики словесы многими, имже последовати и нам, святче помолися.

• Тропарь святителя Никиты, затворника Печерского, еп. Новгородского

  • глас 4
  • Насладився, богомудре, воздержания / и желание плоти твоея обуздав, / на престоле святительства сел еси, / и яко звезда многосветлая, просвещая верных сердца / зарями чудес твоих, отче наш, святителю Никито, / и ныне моли Христа Бога, / да спасет души наша.

• Кондак святителя Никиты, затворника Печерского, еп. Новгородского

  • глас 6
  • Архиерейства саном почтився/ и чисте Чистейшему предстоя,/ прилежно моление за люди твоя приносил еси,/ яко и дождь молитвою свел еси,/ овогда же и града запаления угасил еси./ И ныне, святителю Никито,/ моли Христа Бога/ спасти люди твоя молящияся,/ да вси вопием ти:/ радуйся, святителю отче предивный.

• Тропарь святителя Игнатия Брянчанинова, епископа Кавказского и Черноморского

  • глас 8
  • Православия поборниче, покаяния и молитвы делателю и учителю изрядный, архиереев богодухновенное украшение, монашествующих славо и похвало: писании твоими вся ны уцеломудрил еси. Цевнице духовная, Игнатие Богомудре, моли Слова Христа Бога, Егоже носил еси в сердце твоем, даровати нам прежде конца покаяние.